Поделени мислењата околу објавената листа со имиња на наши иселеници кои добија Мкарти од МНР, со што побргу ќе влегуваат и излегуваат од Македонија, користејќи ги брзите ленти на Меѓународниот аеродром – Скопје. Според новинарот и писател Ивица Челиковиќ, кој живее и работи во Гетеборг- Шведска, ова е тромав, невешт и политиканско – калкулирачки гест за подобрување на соработката со иселениците, како и многу други порано. Критериумите дека Мкарта може да добие наш иселеник кој со работата во странство постигнал голем успех, со што ја афирмира и Македонија, не држат, смета тој.
Вие можете да бидете на Каролинскиот Институт во Стокхолм најуспешен хирург. Тоа не значи дека вие ја промовирате токму Македонија. Вие ја промовирате науката со која се занимавате, а податокот дека сте родени и образувани во Македонија и иселени, апсолутно не се зема предвид како нешто најбитно во однос на вашите квалитети и успеси што ги постигнувате во работата, вели Челиковиќ.
Челиковиќ е незадоволен што Шведска како земја со една од најголемите македонски заедници во светот, каде живеат 15.000 до 20.000 наши иселеници, не е на листата, за разлика од Норвешка или Данска кои се застапени со 13, односно 8 добитници на Мкарта. Тој исто така забележува дека доделувањето на картите не е работа со која требало да се занимава МНР, туку министерот без ресор, задолжен за дијаспората и дека за заслужните иселеници преба да има други практични поволности, а не користење на брзите ленти на скопскиот и охридскиот аеродром.
Иако некои имиња од листата не заслужуваат да се најдат таму, иницијативата треба да се подржи зашто е за подобрување на имиџот на земјава, што го прават и други држави, вели поранешниот амбасадор на Македонија во НАТО, Нано Ружин.
Се настојува пред сѐ да се добие и во подобро поврзување на луѓето од дијаспората со матичната држава . Евентуално нивно искористување во смисла на подобрување на имиџот на државата и секако со одредени други интереси што можат да произлезат од разни економски, политички, социјални и културолошки цели, смета ружин.
Не е во ред што случајот е издигнат на ниво на дипломатски скандал, дополнува Ружин.
Меѓу 69 имиња на научни, културни, спортски работници, лекари, новинари и бизнисмени, кои се најдоа на листата, има две контроверзни. На Глигор Ташковиќ од САД – поранешен министер во владата на Груевски, беше дел од кабинетот на Заев, а беше опфатен и во истрага за измама за продажба на маски во Њујорк за време на корона кризата. И вториот е од САД- бизнисменот Ристо Гуштеров, кој се збогати преку трговија со метали, а потекнува од фирмата Техно Метал Вардар и не успеа да стане пратеник во 2011.
Сотир Трајков