Мандатар за составот на новата влада на Србија повторно ќе биде Ана Брнабиќ, соопшти на денешната прес конференција во Белград, Александар Вучиќ.
Според него, одлуката за новиот премиер била комплицирана, сложена, како во рамки на најголемата владеачка партија во државата, српската напредна партија , така и во рамки на односите со коалиционите партнери.
Вучиќ потврди дека Брнабиќ нема да биде 4 години претседателка на српската влада, мандатот ќе и биде пократок, додавајќи дека промени во владата ќе има во 2024-тата година.
Најблиските соработници на српскиот претседател ќе имаат значајни функции во новата српска влада, како градоначалникот на Нови Сад, Милош Вучевиќ, кој беше главен противкандидат на Брнабиќ во трката за премиерската функција. Многу пофалби од српскиот лидер доби и Синиша Мали, човекот за кој во српската јавност има бројни афери, но според Вучиќ бил еден од најдобрите министри за финансии во Европа.
Позиција на координатор на српските служби за безбедност и важна улога во новата власт ќе има и верниот сојузник на Вучиќ, лидерот на српските социјалисти, Ивица Дачиќ.
„Јас сум горд дека имам таков соработник и дека можам да кажам, можеби не со толку голем легитимитет, но на можеби најважната функција во земјата, уште еднаш предложам жена, способна, образувана, вредна и пред се, лојална на Србија. Јас знам дека на некои други им смета тоа што таа не сака да зборува лошо за мене и за некои други луѓе, но Ана е пред се и секогаш лојална на својата земја и убеден сум дека тоа ќе биде случај и во иднина“ – изјави Вучиќ.