Нови напади со дронови против руски цели се регистрирани на полуостровот Крим и во други делови од Украина кои се под руска окупација.
„Чад се крева над седиштето на црноморската флота на руската федерација во Севастопол“ – објави денеска украинскиот јавен сервис Суспилне, повикувајќи се на локални медиуми и објавувајќи видео снимки од местото на наводниот напад.
Руските власти на анексираниот Крим соопштија дека дрон бил соборен и се урнал во близина на седиштето на црноморската флота на руската федерација во Севастопол. Според гувернерот на најголемиот град на Крим, Михаил Развожаев, соборениот дрон од руските против-воздушни сили се урнал врз покривот на седиштето на флотата околу 8 часот наутро.
Жителите на Севастопол исто така потврдија дека слушнале експлозии во градот.
„Се разбудивме утрово, доручкувавме и по некое време слушнавме татнеж на експлозија. Две слични експлозии случнавме и синоќа кога шетавме покрај морето. Ова беше многу сличен звук на експлозија. Нејасно е што беше. Но, заради тој звук станувате нервозен“ – вели Марина Шкарина, жителка на Севастопол.
Руските медиуми истовремено објавија дека противвоздушната одбрана соборила цели на небото над Севастопол, Јевпаторија и Заозерне. Станува збор за украински дронови, тврди руската армија.
Факт е дека во текот на минатата недела има серија напади против руски воени локации и опрема на Крим за кои Украина официјално не презеде одговорност.
Полуостровот Крим беше анексиран од Русија во 2014-тата година.
По вчерашниот телефонски разговор и договор меѓу рускиот претседател Владимир Путин и францускиот лидер Емануел Макрон за испраќање на инспектори на меѓународната атомска агенција во нуклеарната централа Запорожније, своја поддршка за овој план денеска даде и Украинскиот лидер, Зеленски.
„Со оваа мисија, целосна безбедност во Запорожније и Енерходар може да биде воспоставена. Благодарен сум им на сите кои заеднички работеа за оваа цел и иницијатива. Ако руската уцена со радијација продолжи, ова лето може да влезе во историјата на Европските држави како најтрагичното на сите времиња“ – предупреди Зеленски.
Генералниот секретар на Обединетите Нации, Антонио Гутереш денеска во Истанбул ја набљудува и инспекцијата на бродовите со Украинско жито кои заминуваат од пристаништата на Црното Море.
Гутереш потврди дека досега 25 бродови заминале од Одеса и другите Украински пристаништа откако завојуваните страни потпишаа 4 месечен договор за извоз на житото во Јули.
Со овие бродови досега се пренесени повеќе од 600 000 тони жито и други производи како пченица, пченка и сончогледово масло.
Извозот на овие украински но и на руските производи од прехранбената индустрија е клучен за решавање на проблемот со недостаток на храна и глад кој се закануваше на голем дел од земјите во Африка и Азија.
Никола Илиевски