Кенијката со казахстански пасош, Нора Џеруто триумфираше во трката на 3000 метри со пречки. Таа златниот медал го освои со време од 8 минути 53 секунди и 2 стотинки што е нов рекорд на Светските првенства, а воедно е и трето најдобро постигнување во историјата на оваа дисциплина.
Второто и третото место им припадна на атлетичарките од Етиопија, Веркуха Гетачју и Мекидес Абебе кои исто така имаа резултат под девет минути и ова е прва трка во историјата во која првите три натпреварувачки имале време под магичната границата од девет минути.
Бин Фенг од Кина е сензационална освојувачка на златниот медал во фрлање диск во женска конкуренција. Таа до најголемиот успех во кариерата стигна со далечина од 69 метри и 12 сантиметри што е нејзин личен рекорд.
Со среброто се закити Сандра Перковиќ од Хрватска, која стигна до 12-от трофеј на големите натпреварувања, а трет е Американката, Валери Олман со фрлање од 68 метри и 30 сантиметри.
