Шефот на Украинската дипломатија, Дмитро Кулеба, ијзави дека пред да може да биде извезено житото и пченицата кои ги произведува неговата земја, неопходно е да се гарантира безбедноста на сопствениците на бродовите како и на сопствениците на житото но и на Украинските пристаништа.
Делегации од Украина, Русија и Турција ќе се состанат денеска во Истанбул со претставници на Обединетите нации со цел да договорат безбеден транспорт на житото од Украинските пристаништа на Црното Море до меѓународните пазари. Заради војната, околу 22 милиони тони жито засега не можат да ја напуштат Украина, тврди претседателот на оваа држава, Володимир Зеленски.
Според Украинците, желбата на Русите да избегнат дел од санкциите се заканува да предизвика глад кај милиони луѓе ширум светот кои се прехрануваат со житото од Украина.
Според организацијата за храна и земјоделство на Обединетите Нации, војната ги загрозува пратките со храна за голем број земји во развој и речиси 181 милион луѓе кои живеат во нив.
