Украинските сили извршиле успешна контраофанзива на неколку стратешки точки долж фронтот со руската армија. Украинците тврдат дека ја вратиле контролата врз градот Макарив и ги истиснале руските сили од Ирпин, западно од Киев, успешно спречувајќи ги руските обиди да се опколи украинската престолнина. На југот од земјата, кај Вознесенск, северно од Миколаив, украински војници помогнати од доброволци од цивилното население, фатиле во заседа и уништиле руски оклопен конвој, а украинските власти тврдат и дека армијата напредува кон Херсон, кој падна под контрола на Русија во првите денови на инвазијата.
„Вооружените сили денеска донесоа добри вести. Окупаторите повторно беа прегазени кај Чорнобиавка. Руски авиони повторно беа срушени. Особено важно е дека бомбардер беше срушен во Мариупол. Сите кои ги убиваат нашите мирни луѓе на нашата мирна земја, ќе ги снајде истата судбина.“ – изјави украинскиот претседател Володимир Зеленски.
Но западните воени стратези предупредуваат дека постои голема веројатност пасивноста на руската армија да е резултат на прегрупирање, бидејќи движењето на нејзините копнени сили сугерира дека се подготвуваат за опколување на украинските единици долж фронтот во Донбас и зајакнување на руските позиции околу Харков. Недостатокот на воен напредок преку копнените операции Русите го надоместуваат преку воздушни напади.
„Оперативно тактичката и воената авијација, како и ракетните единици, за еден ден погодија 97 објекти од воената инфраструктура на Украина.“ – рече портпаролот на руското Министерство за одбрана, Игор Конашенков.
Повеќе западни разузнавачки агенции тврдат дека ужасно лошата логистика на руската армија доведе до недостаток на храна, гориво и муниција на истурените единици и тоа е главната причина за брзото губење на моментумот. Тоа е можеби главната причина за жестоката офанзива врз Мариупол, каде речиси 80 проценти од градот е разрушен, но пристаништето останува релативно поштедено.
Помеѓу двете завојувани армии во Мариупол има заглавено 100.000 цивили, и нивната евакуација е практично невозможна.
„Во овој момент, во градот околу 100.000 луѓе живеат во нехумани услови, под комплетна опсада, без храна, вода и лекови, под постојано гранатирање и бомбардирање. Веќе неколку недели се обидуваме да организираме стабилни хуманитарни коридори за жителите на Мариупол и речиси сите наши напори се, за жал, попреченувани од гранатирања или терор од руските окупатори.“ – рече Зеленски.
Во текот на вчерашниот ден од градот успеале да се евакуираат нешто повеќе од 7.000 лица. За разлика од Мариупол, евакуацијата од другите боишта се одвива подобро и денеска биле договорени 9 нови хуманитарни коридори, објави заменик премиерката на Украина Ирина Верешчук.
Според податоците на ООН во соседните земји има повеќе од 3,6 милиони украински белгаци а внатрешно раселените поради војната надминуваат 10 милиони.
Игор Трајков