Политичка предвидливост односно избор на Влада е клучно за натамошниот тек на разговорите и разрешувањето на спорот со Бугарија, смета шефот на македонската дипломатија Бујар Османи. Иако очекувањата на македонската страна беше дека техничката Влада во Бугарија ќе ги продолжи разговорите, тоа се покажа како погрешно.
Со формирањето новата Влада во Бугарија, и ќе може да се дознаат кои се позициите на официјална Софија. Османи смета дека е во интерес на Бугарија решавање на спорот бидејќи Бугарија не сака да биде кочничар на регионот со сите последици. Тој оцени дека кон средината на септември би можело да има пробив секако доколку има политичка воља.
Вчера во Собранието, со 95 гласа за и само еден воздржан, беше изгласана Резолуцијата за македонските државни позиции во контекст на блокадите на европските интеграции односно црвените линии во преговорите со Бугарија. Резолуцијата ја предложи ВМРО – ДПМНЕ и беше дополнета со амандман за употреба на уставното име на државата Република Северна Македонија за кој пратениците од оваа партија не гласаа.
Партиите на Албанците изразија јасна поддршка за македонскиот јазик и идентитет, но Алијанса-Алтернатива побара промена на Уставот и именување на Албанците со нивното вистинско етничко име, а не со изразот „20 отсто“.
Огнен Чанчаревиќ