Матната вода од бунарите и пумпите, како и септичките јами на протест ги извади жителите на селото Чифлик од општината Чешиново-Облешево. Имаат водоводна и канализациона мрежа, но поплавите, а и малите врнежи од дожд покажале дека се неквалитетно изградени, па се мешаат и двете мрежи. Бараат елементарни услови за живот во 21 век, од живо село со млада популација изминатите години пополека се празни. Стравуваат за здравјето на децата, а на политичарите им порачаа на претстојните избори да не им влегуваат во селото.
По 30 години 150 домаќинства од селото Чифлик во Општина Чешиново-Облешето се сплотени. Немање на чиста вода за пиење и канализациона мрежа ги извади на двочасовен протест на магистралниот пат Кочани –Делчево. Го повикаа обвинителството да открие каде се парите и како се трошеле за водовод изграден пред 20 години, а канализационата мрежа пред само пет години, за неа се фрлени 16 милиони денари. Неквалитетната изградба на мрежите ги врати во 19 век, вода да пијат од чешмите од соседните села и да имаат септички јами и полски тоалети.
Немаат елементарни услови за живот, младите не можат да ги сопрат да си заминат во градовите, со години граделе и инвестирале. Сметаат дека матната вода и септичките јами им ги бркаат младите од убавите куќи. Стравуваат за здравјето на учениците и нивните деца. Во училишниот двор на неколку метри е пумпата за вода и полското веце.
Мештаните на партиите без разлика дали се големи или мали им порачаа на претстојните избори да не им влегуваат во селото, најавија бојкот и празни гласачки кутии. Доколку нема повидок на решение секоја недела или неколку пати во месецот ќе излегуваат на протести.
Викторија Јованова