Едни веќе боцнати и се притискаат за рамото, други застанати во редот. Се чека пред поликлиника „Букурешт“, исто како и пред „Јане Сандански“.
Вториот ден вакцинација без закажан термин уште од отворање на вакциналните пунктови ги радува докторите затоа што се сведоци на зголемен интерес за вакцинирање кај луѓето, иако имаат само малку време да здивнат во текот на денот.
Полицајци и денес помагаат во одржување на редот пред вакциналните пунктови, но за разлика од вчера – денес нема тензија, буткање и нервози пред поликлиниките. Судејќи според сликата пред вакциналните пунктови уште од рано утринава, интересот на граѓаните за вакцинација и денес е голем.
Вчера некои од граѓаните се расправаа кој прв да влезе и да се вакцинира, кој е со, а кој без термин, а дополнителна тензија создаваше и долгото чекање пред пунктовите. Денес сликата не е таква, а потврда за тоа стигнува од лекарите од Здравствен дом – Скопје.
„Денес повеќе се почитува редот, заинтересираноста е иста како вчера. Имаме огромна заинтересираност за вакцини без закажан термин, сè се одвива во најдобар ред. Немаме некои инциденти, добро сме организирани и можеме да издржиме“ вели доктор Ана Алексовска – Бошковска, лекар во Здравствен дом – Скопје.
Различно за граѓаните пред пунктовите е тоа кој доаѓа на ревакцина, а кој по прва доза без закажан термин.
Незакажаните досега чекале да добијат термин, но тоа не се случило – па сега сакаат да ја искористат приликата.
На некои им е сеедно каква вакцина ќе добијат, но не и на сите.
„Имав закажано меѓутоа го пропуштив тој термин и сега да видам ако можам да се вакцинирам. Луѓе преферираат – дали да биде „Фајзер“, дали да биде „Спутник“, а кај мене во семејство има и едно и друго и трето и сите се добри.“
„Се имам пријавено за вакцинација уште на почетокот ама не ме повикаа. Сега чекам да видам да прашам кога би можела да добијам „Фајзер“ бидејќи ми е проблем за пасошот. Навистина ми треба „Фајзер“ бидејќи за на факултет ми бараат тоа, а тука има само „Синовак“. Еве стојам тука во редот и размислувам.“
„Чекам половина час. До вечер сигурно ќе дојдеме на ред. Само, проблемот е тоа што на граница само „Фајзер“ признаваат.“
Екипите од Здравствен дом – Скопје покрај вакцинирање во поликлиниките се ангажирани и на терен, со теренската вакцинација која се одвива веќе втор ден, а се посетуваат населените места отсечени од центарот на градот.
Петар Догов