Кластери веќе не се водат, заразата тлее насекаде. Започнуваат најладните месеци во годината, а со нив и неминовниот нов бран на Ковид-19.
Здравствените власти секој ден кројат планови како да ги реорганизираат сите слободни болнички кревети и да додадат кревет плус во борбата со вирусот.
А, со предлози до нив како би им го олесниле креирањето нови мерки и нови политики во оваа кризна ситуација излегоа и специјализантите и младите лекари.
Станува збор за цел пакет предлози – а, во него е опфатено и функционирањето на здравствените установи, но и секојдневниот живот на граѓаните, како очајнички обид за системско спречување на налетот на заразата.
„Болните ќе ви кажат дека ништо не се прави доволно, а персоналот ќе ви каже дека е преморен и неверојатно исцрпен и дека не се прават доволно заштитни мерки за да се превенира оптоварувањето коешто тие го трпат“ изјави доктор Божидар Кочовски од Асоцијацијата на специјализанти и млади лекари.
А, во пакетот со мерки од специјализантите до министерот Филипче и Комисијата за заразни болести се бара воведување на тријажни центри во повеќе болници, а не само онаму каде што постојат во двете најголеми Ковид болници, ГОБ „Осми септември“ и Инфективната.
Пет тријажни центри на територијата на Скопје и соодветно географски распоредени се потребни за да се одговори соодветот на напливот од луѓе кои имаат потреба од лекарска нега.
Од Асоцијацијата има и ред други итни барања.
„Поради клучниот проблем со кислородот да се вклучат сите паметни луѓе во државата за да се овозможи централен довод на кислород до сите болнички кревети. Бараме тренинг за сите коишто одат да работат во Ковид-центар задолжително да бидат здравствено осигурани затоа што има доста случаи на медицински лица со Договор на дело“ вели доктор Кочовски од АСМЛ.
Без дополнителни ограничувања на движењето многу потешко ќе се спречи дополнителното и нагло ширење на вирусот тврдат младите лекари и сметаат дека е важно и да се овозможи да нема големо групирање секаде каде што е можно да се избегне истото, како на пример во јавниот превоз.
За тоа прашање велат дека пуштање повеќе возила во оптек е соодветното решение.
Петар Догов