Хрватскиот министер за финансии Здравко Мариќ си заминува од Владата. Премиерот Андреј Пленковиќ за таа функција ќе го предложи Марко Приморац. Медиуми пишуваат дека информацијата синоќа е потврдена од хрватската Влада.
– Точно е дека Здравко Мариќ, на сопствена иницијатива, си заминува од местото на потпретседател на Владата и министер за финансии. Претседателот на Владата за тоа утре ќе ги извести владините членови и парламентарното мнозинство, изјави портпаролот на Владата, Марко Милиќ, јави Хина.
Здравко Мариќ стана министер за финансии во 2016 година. Од 2019 година, тој е и потпретседател на хрватската Влада.
Од 2008 до 2012 година, Мариќ беше државен секретар во Министерството за финансии.
Медиуми пишуваат дека Мариќ си оди, откако минатиот месец изби афера поради неговиот престој на продолжен викенд во хотелот „Белви“ во Мали Лошињ во 2019 година.
Како што откри порталот „Остро“, тој за сместување за себе, за сопругата и двете деца, тогаш платил 291.20 евра за ноќ, што претставува трипати пониска цена од вообичаените за тоа време во годината.
На Мариќ му се препишуваат и други афери, а најмногу беше на удар на критиките поради судирот на интереси со ангажманот во Агрокор.