Околу 400 новозаразени само во последните три дена, не најавуваат намалување на бројот на позитивни на Ковид-19 во Битола. Градот е најголемо жариште на коронавирусот и е на прво место во земјава со највисока двонеделна инциденца за периодот од 3 до 16 јануари.
Според последниот извештај на Институтот за јавно здравје, во Битола за овој период има 1.760 заболени на 100.000 жители, со што го надмина и Скопје, кое е веднаш зад Битола со 1.697 позитивни на 100.000 жители.
Здравствените власти велат дека состојбата во моментот е исклучително загрижувачка и сериозна, а од Центарот за јавно здравје не очекуваат намалување на бројките на заразени до крајот на јануари. Од 60 до 65 проценти од вкупниот број на тестирани во лабораториите во Битола се позитивни на Ковид-19.
Од Клиничката болница информираат дека и натаму има голем наплив на пациенти, посебно во амбулантите на Инфективното одделение, каде дневно има и над 150 прегледи.
Во моментот во Битола има 1.600 активни случаи. Бројот на починати од коронавирусот од почетокот на пандемијата до денес е 414, додека смртноста 3,7 проценти. Опфатот на вакцинација е 50 проценти од вкупната популација.
Емилија Мисирлиевска