Собранието на денешната седница треба да ја констатира оставката на Премиерот Зоран Заев.
Претседателот на Собранието, Талат Џафери, на брифинг со новинарите рече дека нема основа да се одржат пратенички прашања со оглед на тоа што со оставката на Заев во оставка е целата Влада.
На ова во текот на вчерашниот ден реагираше ВМРО ДПМНЕ повикувајќи се на собранискиот Деловник и членот 93 од Уставот во кој е наведено дека Владата која поднела оставка или на која и престанал мандатот, останува на должност до изборот на нова Влада.
Со ова почнуваат да течат роковите за избор на нова Влада.Претседателот на државата е должен во рок од 10 дена да го довери мандатот, на партијата, односно партиите што имаат мнозинство во Собранието, во конкретниот случај најверојатно тоа ќе биде лидерот на СДСМ Димитар Ковачевски.
Мандатарот е должен во рок од 20 дена да му поднесе на Собранието програма и да го предложи составот на Владата.Седницата за избор на Владата се одржува во рок од 15 дена од денот на приемот на прелогот за состав на Владата и програмата.
Расправата трае два дена.Во партиите во тек се внатрепартиски консултации за изборот на новиот владин кабинет.