Две години откако пандемијата на Ковид-19 во првите месеци ја пустошеше Италија, владата дозволи отварање на ноќните клубови, благодарение на високиот процент на вакцинирани и малиот број на нови случаи.
По речиси две години во кои бевме затворени, ова е вистински момент за луѓето кои сакаат да танцуваат, шетаат и да се забавуваат. Ова ни е прво излегување по речиси две години и можеме повторно да живееме. Навистина е добро, изјави Кристијана, посетителка на ноќен клуб во Рим.
Иако во текот на летото минатата година Италија ги олабави рестриктивните мерки, ноќните клубови останаа затворени, за разлика од рестораните, кината и театрите. Дозвола за работа имаа само клубовите кои имаа простор на отворено, но само како коктел барови.
Конечно си го вративме животот. Конечно! Сите имаме дозволи. Да се надеваме дека сите ќе се вакцинираат за да се вратиме во нормала, изјави Мафи Фиа, чекајќи во редот пред ноќен клуб во Рим.
Италија беше првата европска земја во која Ковид-19 ги преплави болниците и мртовечниците. Во пикот на епидемијата беа забележани повеќе од 40.000 новозаболени дневно, а бројот на починати достигна до 1.000. До сега во Италија вирусот го прележаа повеќе од 4 милиони и 700 илјади, додека починаа 131.500 лица.
Денеска Италија има висока стапка на вакцинација од 70 проценти од целокупната популација. Стравувајќи од повторување на пролетта и есента од 2020 година, владата ги воведе едни од најстрогите услови и мерки за вакцинација во Европа. Во земјата вчера се одржаа масовни протести по последната одлука на владата, според која сите вработени, во приватниот и јавниот сектор мораат да бидат вакцинирани, или ќе мораат да платат казна од 1.500 евра, додека казни исто така се предвидени и за компаниите чии вработени нема да бидат вакцинирани.
Игор Трајков