Директорот на БЈБ, Александар Јанев, денеска од Кочани порача дека лично се информирал за сите детали и околности поврзани со настанот од петокот, кога преку прозорот на полициската станица побегна приведениот Александар Лазаров.
Јанев вели дека случајот сериозно ја наруши довербата во полициската служба.
- Бегството од полициската станица на лице познато на полициските служби е сериозен инцидент кој бара целосно расчистување на сите околности и преземање на соодветни мерки, напиша тој на својот ФБ профил.
Директорот на БЈБ пишува дека доколку се утврди намерно постапување, помагање, прикривање или несовесно извршување на службените задачи, ќе има одговорност.
– Внатрешната контрола, со поддршка на колегите од неколку централни оддели во БЈБ, веќе постапува и ги проверува сите околности и инволвирани лица. Секој кај кого ќе се утврди пропуст или вина ќе биде соодветно санкциониран. Очекувам целосна професионалност и непристрасност во целиот процес, вели Јанев.
© 2020 Телевизија Телма. Сите права се задржани.
Овој текст не смее да се печати или емитува, во целина или во делови, без договор со Телевизија Телма.