Неексплодирана артилериска граната од Првата светска војна беше безбедно отстранета од плажа на брегот на Дојранското Езеро, соопштија од Дирекцијата за заштита и спасување.
Станува збор за граната со калибар од 100 милиметри и тежина од 13,6 килограми, која била пронајдена на плажата, а по пријавата интервенирал пиротехничарот на ДЗС, Зоран Пејев. Тој успешно ја обезбедил и ја отстранил без опасност за граѓаните и посетителите.
Од Дирекцијата информираат дека гранатата била наменета за хаубица М14 и потекнува од Првата светска војна. Вакви неексплодирани убојни средства и натаму повремено се откриваат во региони кои биле зафатени од воените дејствија, најчесто во Дојранскиот, Гевгелискиот, Битолскиот и Охридскиот регион.
Надлежните апелираат граѓаните доколку забележат сомнителни или неексплодирани убојни средства да не ги допираат, туку веднаш да ги пријават на надлежните служби за да бидат безбедно отстранети.
Сузана Мицева