Правото на слободно поставување на прашања и критичко известување на новинарите е неотуѓиво, но подразбира и обврска за доследно почитување на професионалните и етичките стандарди, потсетија од Советот на честа при Здружението на новинари по случајот со тетовскиот новинар кој со непочитување ѝ се обрати на министерката за образование.
„Советот цени дека начинот на комуникација и тонот на обраќање на новинарот не соодветствуваат со принципите на достоинствен и професионален јавен дискурс. Конкретно, членот 15 од Кодексот на новинарите, вели дека новинарот мора да ја негува културата на говорот и етиката, а непримерната комуникација со јавноста е неспојлива со новинарската професија. Ваквите случаи не придонесуваат за унапредување на довербата во медиумите, ниту за квалитетен јавен дијалог“, соопштија од Совет на чест при ЗНМ.
Советот на честа апелира до сите новинари и медиумски работници да се придржуваат кон највисоките професионални стандарди, да ја негуваат културата на комуникација и да придонесуваат кон градење на взаемна почит во јавниот простор.
Воедно, потсетуваат дека почитта во односите меѓу носителите на јавни функции и медиумите треба да биде двонасочна.
За случајот реагираа и од владата со загриженост, особено затоа што, како што велат, „ова не е изолиран инцидент, туку повторување на веќе забележано однесување кон истата носителка на јавна функција, што отвора сериозни прашања за почитувањето на основните професионални стандарди и етички норми„.
Министерката Јаневска со слична ситуација како онаа во Тетово се соочи и пред јавната дебата за предлог Законот за високо образование, кога повторно мораше да се објаснува околу употребата на јазиците.
Далиборка Демјанска Цветановска