Извештајот од судска медицина за убиството на 14 годишната Вања Ѓорчевска се уште не е доставен до обвинителството. Обдукцијата треба да ги утврди причините за насилната смрт и точното време кога е убиена, како и да обезбеди дополнителни докази против осомничените. Извештајот од обдукцијата е еден од клучните докази во истрагата и целосно расветлување на случајот.
„Јавното обвинителство е во фаза на прибирање на сите докази. Извештајот од судска медицина за Ѓорчевска не е официјално е доставен до обвинителството“.
Обдукцијата трае повеќе од две недели. Вања беше пронајдена мртва на 3 декември. И натаму останува отворено прашањето зошто Вања толку брзо е убиена, по два и пол часа од нејзиното грабнување на 27 ноември утрината. Осомничениот за грабнувањето и убиството на Вања, Љупчо Палевски Палчо е во притвор во Турција. Барањето за негова екстрадиција е примено од тамошните власти. Ќе бидат потребни месеци за екстрадиција на Палевски, бидејќи тој може да се жали во текот на постапката. Максималниот период кој Палевски може да биде држен во притвор е една година.
Министерот за внатрешни работи Оливер Спасовски вчера потврди дека има проблеми во функционирањето на системот кој не ги затвори убијците на Вања иако тие претходно имале насилни кривични дела. Тој вината не ја гледа во полицијата која постапува и апси, туку во судството, бидејќи процесите за казнување на луѓето како групата на Палевски застануваат во оваа институција.
Марија Митевска
