Најнаселената австралиска држава, Нов Јужен Велс, усвои нови строги закони за оружје и борба против тероризмот по масовното пукање на плажата Бонди во Сиднеј, во кое загинаа 15 лица.
Со измените се ограничува поседувањето огнено оружје, се забранува јавно истакнување на терористички симболи и се прошируваат овластувањата на полицијата за ограничување протести.
Според новите правила, повеќето граѓани ќе можат да поседуваат најмногу четири парчиња оружје, додека на земјоделците ќе им бидат дозволени до 10.
Членство во стрелачки клуб станува задолжително за сите носители на дозвола, а полицијата ќе може да воведува рестрикции за протести до три месеци по прогласен терористички напад.
Прекршителите што јавно ќе прикажуваат симболи на забранети милитантни организации се соочуваат со затвор до две години или високи парични казни. Активистички и про-палестински групи најавија правна постапка, оценувајќи дека законите неоправдано ги ограничуваат граѓанските слободи и правото на протест.
Владата, пак, тврди дека мерките се неопходни за безбедност и спречување омраза и насилство, додека федералните власти најавуваат дополнителни чекори против говорот на омраза на национално ниво.