Собраниската Комисија за прашања на изборите и именувањата денеска ќе одржи седница со почеток во 12 часот, на која се очекува да се формира Комисија за селекција на кандидати за претседател на Државната комисија за спречување на корупцијата (ДКСК).
Ова следи по оставката на поранешната претседателка Татјана Димитровска, која се соочува со кривични обвиненија за оддавање службена тајна и компјутерски фалсификат.
Собранието на 5 август распиша јавен оглас за нов претседател, со рок за пријавување од 10 дена.
Според Законот за спречување на корупцијата, по објавувањето на огласот, Комисијата за избори и именувања има рок од 10 дена да формира селекциска комисија која ќе ја спроведе постапката.
Таа ќе ги разгледува документите, ќе организира интервјуа со пријавените кандидати и ќе предложи ранг-листа.
Најдобрите кандидати потоа ќе бидат предложени до Собранието, кое ќе го избере новиот претседател на Антикорупциска.
Кандидатите мора да исполнуваат строги критериуми во поглед на образование, искуство и независност од политички влијанија.