Соединетите Американски Држави и Русија договорија состанок меѓу Доналд Трамп и Владимир Путин во наредните денови, изјави претседателскиот советник во Москва, Јуриј Ушаков, јавува руската државна агенција РИА Новости.
„На предлог на американската страна, начелно е постигнат договор за одржување на билатерален состанок на највисоко ниво во наредните денови, односно состанок меѓу претседателите Путин и Трамп“, рече Ушаков.
И локацијата за состанокот е договорена, но ќе биде објавена дополнително, додаде советникот на Путин.
Според Ушаков, специјалниот пратеник на Белата куќа, Стив Виткоф ја споделил идејата и за трилатерален состанок меѓу Путин, Трамп и Зеленски, но Москва не одговорила на таквиот предлог.
„Предлагаме, пред сè, да се фокусираме на подготовка на билатерален состанок со Трамп и сметаме дека е најважно тој состанок да биде успешен и конструктивен“, нагласи Ушаков.