Седум пожари на отворен простор сè уште се активни на територијата на државата, од вкупно 27 евидентирани во изминатото деноноќие. Според Центарот за управување со кризи (ЦУК), три пожари се под контрола, а 17 се целосно изгаснати. Пожарите зафаќаат предели со ниска вегетација, мешана и борова шума, главно во региони околу Прилеп, Македонски Брод, Кавадарци, Кичево и Малешевијата.
Во справувањето со огнената стихија се очекува меѓународна помош. Чешка ќе испрати хеликоптер, а Словенија испраќа тим од 50 пожарникари со специјализирана опрема. Дел од терените се непристапни, а на некои локации, како во Бешиште, се слушаат детонации, поради што не се интервенира директно.
УХМР најави нестабилно и посвежо време со повремени врнежи, грмежи и северозападен ветер, што може да помогне во гаснењето.
Температурите денеска ќе се движат меѓу 27 и 35 степени. Властите апелираат до граѓаните да избегнуваат палење оган на отворено и да пријават сомнителен чад.
