Во изминативе неколку недели овие институции ни ја потрошија и последната тронка надеж и доверба, порачаа семејствата на загинатите деца во пожарот во дискотеката „Пулс“ во Кочани. Со семејствата на загинатите млади луѓе од кочанскиот регион денеска протестираше и семејството на Ѓоко Георгиевски тапанарот на групата ДНК. Неговиот татко со болка и голема лутина им се обраќаше на надлежните институции, бидејќи не е задоволен ниту од истрагата, ниту пак од институциите. Ги искина и писмата кои му ги испратиле претседателката Гордана Силјановска Давкова и премиерот Христијан Мицкоски.
На министерот Тошковски му забележа дека има полицајци кои само кафиња пијат, а крадците кои имаат украдено лични предмети на неговиот син од неговото вечно почивалиште, тој самиот ги фатил. Побара и оставки на функционерите на актуелната власт.
Родителите и блиските на загинатите додека маршираа низ улиците во Кочани извикуваа сакаме правда.
Пред зградата на полицијата на министерот Тошковски и обвинителот Коцевски им порачаа дека им должат одговор како е можно полицијата да прави акциска контрола во објект кој воопшто не смеел да работи, објект кој во моментот немал никаква валидна лиценца, никаква дозвола, а имал и блокирана сметка од УЈП. Револтирани беа што полициски службеник ги снимаше додека говореа пред полициската станица во Кочани.
Истоштени од болка и лутина мајките пред обвинителство клекнаа и седнаа. Во говорот пред судот потенцираат дека како мајки сакат да си ја смират душата, а кога ќе отидат на гробовите на своите деца да можат да и им кажат виновниците се зад решетки, барем правдата ја задоволивме !!
Ова не само трагедија. Ова е повик за будност. Повик за одговорност порачаа родителите на загинатите деца во дискотеката „Пулс“. Најавија дека на протест ќе отидат и во Скопје. Во најголемата трагедија во земјава загинаа 62 млади луѓе, а 200 беа повредени
Викторија Димитрова Јованова