Поништена е затворската пресуда за Беким Хаџиу, сопственикот на Беса Транс, чиј автобус се запали во Бугарија и во него изгореа 45 луѓе меѓу кои и десетина деца. Скопскиот апелациски суд ја поништи првостепената пресуда за 20 месеци затвор бидејќи се утврдени фактички грешки во наводите на пресудата и обвинителството. Судењето сега ќе почне одново во кривичниот суд.
Хаџиу и фирмата Беса Транс беа обвинети за фалсификување на јавна исправа односно дека за изгорениот автобус никогаш не извадиле лиценца за транспорт надвор од границите и дека наместо сопствен извод било користен извод од лиценца за друг автобус.
Кривичниот суд ги осуди, но Апелација утврди дека има грешки во наведеното време на извршување на делото и во бројот на користење на тој „позајмен“ извод. Обвинителството тврдело дека кобниот автобус 20 пати излегувал од Македонија со туѓи изводи од лиценца, а Апелација утврдила само 10 пати.
Апелација препорачала и во обвинението и пресудата прецизно да бидат наведените дејствијата за кои е обвинета фирмата Беса Транс. Неспорно е дека е користен извод од лиценца која не припаѓа на автобусот кој се запали, но не е утврдена точна фактичка состојба, ни рекоа од Апелацискиот Суд.
Одбраната поднесе жалба бидејќи сметаше дека станува збор за фалсификат на документ затоа што според нив, за да има фалсификат некој мора да креира лажна исправа, а во случајот со Беса транс не се случило.
Пред три години се случи сообраќајна несреќа во Бугарија во која се запали автобус на „Беса транс“ каде загинаа 45 лица. Автобусот на проблематична кривина на автопатот Струма удри во гранична банкина и потоа заврши на средина на патот каде се запали и изгоре.
Бугарија не најде одговорност во никој и истрагата посочи дека возачот на автобусот бил одговорен за излетувањето од патот по што автобусот се запали.
Тамара Марковска