Да не му падне на памет никому да ја толкува денешната одлука како наша слабост, предупреди претседателот на Уставниот суд,откако мнозинството судии одлучија да се одложи одлуката за Законот за употреба на јазиците, со цел да се одржи подговителна седница за консултации со домашни и странски експерти. Костадиновски уверува дека, овој суд ќе донесе конечна одлука за предметот, кој е најстар во судот и чека разрешница веќе пет години.
Очекува седницата да се одржи на почетокот на март, а судијата известител има рок до 23 овој месец да ги подготви спорните правни прашања за кои ќе биде побаран и пријателски совет од Венецијанската комисија. Потенцираше дека, внимателниот пристап кон овој предмет има цел да ги разубеди граѓаните, а не политичарите, кои ги обвини за притисоци, лаги и манипулации.
Костадиновски е разочаран и од писмото кое му го испратија 250 интелектуалци Албанци, за кои рече дека, наместо да шират и афирмираат знаење, подлегнуваат под политички влијанија.
Против подготвителна седница беше судијката Добрила Кацарска, која сметаше дека, ништо нема да се добие со тоа, затоа што уставните судии се најголемите уставни експерти во државата, а Венецијанската комисија веќе има дадено јасни препораки за законот во 97 точки.
На почетокот на седницата, судијата Фатмир Скендер од турската заедница побара да се одложи предметот, поради отсуството на судиите Осман Кадриу и Насер Ајдари.
Неговите колеги укажаа дека, заклучокот, да се одлучува со присуство на сите судии, бил донесен пред две години, кога судот функционираше само со петмина судии и се однесувал на тоа да се почека да се комплетира судот, како и дека, одложувањето на предмети поради нечие отсуство би можело да се злоупотребува во иднина.
Далиборка Демјанска