Од нашиот специјален известувач од Вашингтон
Игор Трајков
„Ова не е време да ги кренеме рацете, туку да ги засукаме ракавите“, порача потпретседателката Камала Харис во нејзиниот говор на Хауард универзитетот овде во Вашингтон по поразот од Доналд Трамп на претседателските избори.
Останувајќи верна на партиската реторика, но не споменувајќи ги директно обвинувањата на кои ја заснова целата нејзина предизборна кампања, Харис призна дека не го добиле резултатот кој го посакувале, но тоа не значи дека се откажуваат од борбата која ја водеше кампањата.
„Никогаш нема да се откажам од борбата за иднина во која Американците ќе можат да ги следат своите соништа, амбиции и аспоирации. Каде американските жени ќе ја имаат слободата сами да одлучуваат за своите тела, а не владата да им кажува што да прават со нив“, изјави сè уште актуелната потпретседателка на САД, Камала Харис.
Дејствувајќи брзо да ги смири страстите по стравувањата дека политичката поларизација во американското општество може да прерасне во насилство по заканите кои се појавија од поекстремните струи и во двете партии, да не се прифатат резултатите од изборите, Харис порача дека мирната транзиција на власта е основен принцип на американската демократија.
„Секој што ја бара довербата од јавноста мора да го почитува тој принцип. Во исто време, во нашата нација не им должиме лојалност на претседател или партија, туку на Уставот на САД, нашата совест и нашиот Бог“, додаде Харис.
Во меѓувреме пребројувањето на гласовите продолжува. Иако претседателската трка е решена, а во Сенатот остануваат само дилемите колкаво ќе биде мнозинството на републиканците, во Претставничкиот дом се води мртва трка. Влогот е голем и за двете страни, или републиканците ќе ја преземат целокупната извршна и законодавна власт, или демократите ќе го зачуваат својот изборен образ и ќе дејствуваат како коректор на Трамп и републиканците.