Со испитување на сведоци на предлог на Обвинителството, во Основниот кривичен суд Скопје денеска продолжи судењето за двојното убиство на малолетната Вања Ѓорчевска и велешанецот Панче Жежовски.
На денешното рочиште сведочеше Музафер Каришиќ, кој на 27 ноември кога беше грабната и убиена 14-годишната Вања Ѓорчевска, бил помошник-началник на СВР Скопје за криминалистички работи и насилен криминал. Претходно овој сведок одговараше на прашања на обвинителката, за чудното однесување на таткото на Вања, обвинетиот Александар Ѓорчевски, кој не престанал да тврди дека Вања е киднапирана и убиена и дека џабе ја бара полицијата.
Тој во своето сведоштво денеска рече дека Влатко Кешишев ја однел полицијата најпрвин на местото каде бил запален Цитроенот, а потоа и на местото каде била закопана Вања. Кешишев не им кажал најпрвин зошто ги носи таму. Кога стигнале на местото, тогаш на помошник началникот Кариши не сакал да му каже за што станува збор, но потоа со глава му ја посочил на душеци и перници.
„Ќе те однесам, ќе ти кажам, меѓутоа се плашам да не ме каже некој од колегите кај Палчо. Палчо ќе ме убие“, му рекол Кешишев на помошник началникот.
Тој бил човекот кој го открил и местото каде била закопана лопатата со која биле ископани дупките за жртвите. Денешното рочиште продолжува со сведечење на уште еден сведок за случајот.