Европската унија ја одобри Реформската агенда на Северна Македонија во рамките на Планот за раст на Западен Балкан.
Според новиот Инструмент за реформи и раст, Северна Македонија ќе добие 750,4 милиони евра за периодот 2024-2027 година.
Овие средства ќе бидат условени со реализирање конкретни квалитативни и квантитативни чекори во однос на планираните реформи.
Според објавата на унгарското претседателство со ЕУ, Реформските агенди на Северна Македонија, Албанија, Србија, Црна Гора и Косово се одобрени во рамките на новиот Инструмент, кој вкупно е вреден 6 милијарди евра.
Оваа поддршка има за цел да го усклади интеграциониот процес на овие земји во ЕУ.
Првата транша од 52,5 милиони евра се очекува да биде исплатена најдоцна до крајот на годината.
Планирано е средствата да се исплаќаат во неколку транши во текот на следните три години, во зависност од напредокот во реализирањето на реформите.
Советот на Европската Унија го одобри Планот за раст на Западен Балкан на почетокот на мај, нагласувајќи ја важноста на поддршката за овие земји во нивниот пат кон членство во ЕУ.