До Нова година се очекува „Бехтел&Енка“ да почне со работа на терен на Коридорот 8 и Коридорот 10д, бидејќи сè уште не е завршен процесот на експропријација, за кој државата ќе треба да обезбеди пари, настрана од предвидените 1,3 милијарди евра за изградба на автопатиштата. Ова денеска го обелодени директорот на ЈП „Државни Патишта“, Коце Трајановски. Роковите за експропријација и дислокација на електрични и телекомуникациски водови, според Трајановски, биле до крајот на 2023 година, но не биле испочитувани од државата.
„Последниот месец и нешто, имаме голем напредок во експропријацијата. Ако не ја решиме експропријацијата, тие не може да влезат на терен. Тие влегуваат откако ќе биде исчистено земјиштето. Значи, да биде извршена експропријацијата, да бидат дислоцирани каблите, да има деминирање, дури и проектирањето е под надлежноста на Република Македонија и не е под тие 1,3 милијарди евра“, вели Трајановски.
Жители на прилепското село Ореовец изминатите три месеци со протести го попречуваа ископот на градежен материјал за потребите на „Бехтел&Енка“ за изградба на автопатот Прилеп – Битола. Во февруари годинава протестираа и жителите на гостиварското село Бањица, бидејќи не сакаа да ги отстапат нивните ниви за работите на автопатот од Коридорот 8.
„Ние работиме интензивно за да може што побргу да започне „Бехтел&Енка“ со работа. Се надевам дека пред Нова година ќе успееме да ги внесеме на терен“, додаде Трајановски.
Министерката за финансии Гордана Димитриеска-Кочоска пред една недела изјави дека за следната годината за овој проект ќе бидат планирани 250 милиони евра.
Марија Митевска