Фатмир Битиќи, Јованка Тренчевска и Перо Костадинов поднесоа оставки на функциите во СДСМ по катастрофалниот пораз на партијата на парламентарните и на претседателските избори.
„Како потпретседател на Социјалдемократскиот сојуз на Македонија, обврзан на етички и демократски вредности, одлучив да поднесам оставка од функцијата потпретседател на партијата. Мојата оставка комплетно ќе се ефектуира кога останатите мои другари и другарки кои го сочинуваат партиското раководство ќе го направат истото – од првиот до последниот. Во целата моја политичка кариера барам лична одговорност од сите чинители – и овој акт е токму тоа. А оставката на раководството е неопходен чекор кон враќање на довербата на граѓаните и трасирање на патот кон иден политички успех“, наведува Битиќи во објавата на Фејсбук.
Костадинов, според партиски извори, ја поднел оставката по синоќешната прес-конференција на лидерот на СДСМ, Димитар Ковачевски кој најави одговорност од сите во партијата, почнувајќи од него и повика на внатрепартиски избори. Одлуката за повлекување од потпретседателската позицијата во партијата подоцна ја објави и на Фејсбук.
Оставка објави и дополнителната министерка за труд и социјална политика и претседателка на форумот на жени на СДСМ, Јованка Тренчевска.
Понудените оставки треба да бидат верификувани на Конгрес на партијата на чиј дневен ред ќе најде точка за одговорност на раководство за изборните резултати.