По орканскиот ветар во неколку општини во источниот регион штетите се санираат, а проценителите пресметуваат колку пари ќе требаат да се санираат кровните конструкции на неколку витални објекти.
Во Штип од ветерот кој се движеше со брзина од 134 километри на час настрадаа кровните конструкции на болницата, училиштето „Ванчо Прќе“ и детската градинка „Вера Цириви Трена“.
За целосна санација на кровот на училиштето и градинката се потребни еден милион денари на Општината, а пак за болницата се уште се прави пресметката колку би чинела санацијата и пациентите да се вратат на одделението за ортопедија, кои сега се сместени по други одделенија, а новите случаи се хоспитализираат по другите болници во земјата.
- На Клиничката болница во Штип, е направена првична санација на оштетениот дел од кровната конструкција, со цел да се спречат дополнителни штети при нови врнежи. Во тек е отстранување на шутот, а поради работите привремено е променет пристапот на возилата и пациентите. Пациентите со скршеници се уште се препраќаат по другите здравствени центри. Колку ќе чини целосната санација, дополнително ќе биде познато по завршување на проценката – соопштуваат од КБ Штип.
Граѓаните од Штип, Кочани, Чешиново-Облешево и Пробиштип ги пријавуваат штетите во општините. За само неколку дена во Пробиштип има доставено над 100 пријави.
Општинските комисии веќе се на терен за да ги проценат штетите кои ги имаат граѓаните и институциите од силното невреме.
Викторија Јованова
