Генералната оценка на движењето ЗНАМ за денешните избори е дека и покрај тоа што изборниот ден беше релативно мирен, тие како политичка партија изборите ги оценуваат како делумно фер и демократски.
Според партискиот портпарол Никола Мемов, ваквата оценка се должи на најмалку две причини.
Првата е дека и покрај тоа што Изборниот законик предвидуваше медиумско претставување на политичките претставници, сепак имавме апсолутна нерамноправна претставеност во медиумите во текот на целата кампања, и фаворизирање на четирите кандидати од најголемите политички партии. Втората причина е политичкиот притисок којшто се вршеше врз нашиот кандидат за претседател, преку монтиран судски процес поради одбрана на јавниот интерес наспроти бизнис интересите на фирми спонзори на власта. Г-дин Димитриевски беше повеќе пати повикуван на судски рочишта и распит во обвинителството на среде кампања, само со цел да се наруши неговиот личен углед и динамиката на нашата кампања, рече Мемов.