Утринава официјално стартуваше Австралија опен. Актуелниот бранител на трофејот Новак Ѓоковиќ стартуваше со победа, но мораше добро да се помачи против дебитантот Дино Призмиќ.
Светскиот рекет број 1 го одигра најдолгиот меч во 1.коло на Австралија опен во својата кариера. Србинот беше ставен на сериозен тест против младиот Хрват, но на крајот победи со 6-2, 6-7, 6-3 и 6-4 по четири часа игра. Ѓоковиќ ја бара својата 11-та титула во Мелбурн, каде нема пораз уште од 2018 година. Во следната рунда тој ќе се соочи со победникот од дуелот помеѓу Алексеи Попирин и Марк Полманс.
Четвртиот носител на грен слемот, Јаник Синер во три сета го победи Ботик ван де Зандшулп. Андреј Рубљов добро се намачи против Бразилецот Тијаго Сејбут Вајлд и славеше во пет сета. Марин Чилиќ испадна од Унгарецот Фабијан Маросан во четири сета, а Франсес Тиафо го победи Борна Чориќ во четири сета. Пласман понатаму обезбедија Матео Арналди, Јауме Мунар, Франциско Серундоло, Тејлор Фриц и Себастијан Баез.
На женскиот дел од грен слемот, втората фаворитка Арина Сабаленка ја прегази Ела Сајдел од Германија и ѝ препушти само еден гем на мечот.
Барбора Крејчикова како деветта носителка ја победи Маи Хонтама во три сета, Марија Сакари со 6-4 и 6-1 ја совлада Нао Хибино, но првата рунда не ја мина 13-тата фаворитка Лјудмила Самсонова, која загуби од Аманда Анисимова со 3-6 и 4-6. Во следното коло се пласираше поранешната најдобра светска тенисерка Карилин Вожњацки откако нејзината противничка Магда Линете се повлече поради повреда во вториот сет при негатива од еден сет.