Еурофарм Пелистер ја продолжи губитничката низа во ракометната Лига на шампиони. Битолчани денеска пред своите гледачи го запишаа десетиот пораз на десетиот натпревар. Загреб е последниот тим во елитата што си замина со цел плен од салата „Боро Чурлевски“.
Еурофарм Пелистер денеска беше најблизу до позитивен резултат, бидејќи загуби минимално со 22-23. Хрватскиот шампион беше тимот што го диктираше резултатот во текот на сите 60 минути, а нашиот состав ниту еднаш го немаше водството. Во првиот дел разликата беше од три до пет голови, а на полувремето резултатот гласеше 10-13. И на стартот на вториот дел предноста на Загреб повторно достигна највисоки +5. Пелистер најмногу што направи е што успеа да го израмни резултатот на 18-18, но немаше сили да го сврти натпреварот во своја корист. Загреб на крајот славеше со 22-23.
Филип Кузмановски со осум голови беше најефикасен во редовите на македонскиот првак, Павле Петровиќ имаше четири. Калифа Гедбане забележа 14 интервенции на голот. Кај Загреб, Лука Кларица со пет голови беше најефикасен, а на голот блескаше Матеј Мандиќ со 19 одбрани.
На табелата во групата А, Пелистер е последен на осмото место без бодови по 10 натпревари, а Загреб е шести со 10 бодови. Следниот натпревар во Лигата на шампиони нашиот првак повторно го игра на 14 февруари 2024 година и го пречекува ПСЖ.