Љупчо Палевски Палчо, осомничен за грабнувањето и убиство на 14-годишната Вања Ѓорчевска и 74 годишниот Панче Жежовски е фатен во Турција. Министерот за внатрешни работи Оливер Спасовски сликовито го прикажа неговото апсење во турскиот град Баликесир и потврдата која ја добил од колегите од Интерпол во земјата.
Како што беше познато досега, Палевски најпрвин заминал за Белград, каде престојувал во еден хотел. Го однел неговиот адвокат, кој мислел дека осомничениот имал закажан лекарски преглед. Потоа друго лице, Стефан Димковски, кој сега е во притвор со џип „Ленд Ровер“ го пренел во Бугарија и оттаму во Турција. Димковски беше фатен на граничниот премин Дојрани кај Дојран.
Палевски во одреден момент се упатил кон Истанбул, но се вратил во Баликесир. Засега не е познато дали имал друга крајна дестинација како Русија или Белорусија, како што се шпекулираше во медиумите.
Спасовски не ја исклучи веројатноста дека осомничените кои се членови на партијата Десна, а нејзин лидер е Палевски биле под странско влијание со цел дестабилизација на државата. Порача дела такво криминално гнездо мора да се разбие до крај и таа партија мора да биде дерегистрирана.
На прашањето за какво странско влијание, Спасовски одговори со прашање.
- „Не знаеме какви ставови застапуваа лицето и неговата партија? Не знаеме дека директно се спротивставија на напредокот на државата, се спротивставија на НАТО“- Оливер Спасовски, министер за внатрешни работи.
Во врска со процесот за екстрадиција на Палевски во Македонија, министерот рече дека тоа ќе се одвива по процедура и очекува да се заврши најбрзо што може.
Два пиштоли се најдени во околината на Скопје кои се поврзуваат со убиствата. Пронајден е и мобилниот телефон на Вања. Спасовски потврди дека Вања била застрелана, а не задушена, како што се шпекулираше. Тој очекува истрагата за убиството на Вања да се прошири.
МВР претходно поднесе кривична пријава за двете убиства. Обвинителството сега преминува во фаза на истрага против пет лица. Четворица од нив се осомничени за грабнување и убиства на Ѓорчевска и Жежовски. Таткото на Вања, Александар е осомничен за помагање при извршување на кривичното дело – Грабнување на малолетно лице.
Обвинителството сподели и детали за убиството на Жежовски. Тие влегле во неговиот дом и го грабале со цел да им го даде неговиот автомобил Цитроен. Го нападнале и врзале и потоа го убиле со огнено оружје во близина на селото Рудник.
Марија Митевска