Дваесет сопственици и директори на 28 фирми се уапсени, а шестмина сè уште се недостапни во денешната акција на Јавното обвинителство за гонење организиран криминал и Финансиската полиција со кодно име „Синџир“. Тие се осомничени за злосторничко здружување, затајување данок и за перење пари.
Тие се сомничат дека основале или преземале фирми, преку кои изготвувале лажни фактури за да избегнат плаќање ДДВ.
Според обвинителството, на тој начин го оштетиле буџетот за над 490 милиони денари, односно за скоро осум милиони евра.
За 13 осомничени е побаран притвор, за еден домашен притвор, а за останатите 12 други мерки за претпазливост, како одземање пасош, забрана на напуштање на живеалиштето и забрана за контакти со одредени луѓе. Побарано е замрзнување имот на пет луѓе и седум фирми.
Тројца неготинци се осомничени дека ја создале криминалната група во 2019, а потоа им се приклучувале и други осомничени.
Утринава беше соопштено дека обвинителството и финансиската полиција апсат луѓе и претресуваат објекти на повеќе локации во Неготино, Кавадарци, Битола и Охрид.
Срѓан Стојанчов