Горел комунален отпад и тоа со часови. Во првиот дел од депонијата „Дрисла“ близу до влезот, дел од отпадот утрово е претворен во пепел.
Надлежните истражуваат, а првичните информации се дека подметнувачи го предизвикале огнот на неколку километри од центарот на Скопје. Ова го соопшти директорот на Државниот инспекторат за животна средина, а треба да го потврди истрагата која е во тек, за што брифираат од полиција.
Пожарот бил силен и најпрво го гаселе вработени во претпријатието. Потоа се вклучиле и неколку возила од скопска Пожарна.
„Депонијата најверојатно е намерно запалена. По информација на директорот на ЈП Депонија „Дрисла“ пристапено е веднаш со информирање на противпожарната служба и Министерството за внатрешни работи. Со помошната механизација со којашто располага јавното претпријатие „Дрисла“, пожарот во 08:30 часот е изгаснат“ вели Сретен Стојковски, директор на Државниот инспекторат за животна средина.
Ова е втор инцидент на депонијата „Дрисла“ и тоа во само два дена. Вчера имало испуштање на исцедок од депонијата во Маркова река. Од акредитирана лабораторија земени се мостри, а потоа и ќе има соодветни мерки према правниот субјект, велат од Инспекторатот (ДИЖС).
Претходно од претпријатието депонија „Дрисла“ во допис до медиумите реагираа дека изминатите денови се шират лаги и невистини дека депонијата со своето работење го загрозува здравјето на граѓаните.
Според менаџментот на претпријатието, тоа било случај и откако беа споделени видеа на социјалните мрежи од пожарот.
Петар Догов