Утре започнува новата учебна година без учебниците за трето и шесто одделение. Министерот за образование Шаќири потврди дека ги нема сите неопходни материјали, но не се чуствува одговорен за тоа. Учебниците за третооделенците се во фаза на печатење и наредниве неколку дена се очекува да бидат диструбирани во училиштата. Учебниците за шестооделенците се во фаза на одобрување од Националната комисија. Потоа ќе следи жалбена постапка, па дури потоа нивно печатење. Министерот Шаќири како и секогаш уверено кажа дека до крајот на Септември учебниците ќе бидат во училиштата и тврди дека се што било во негова надлежност веќе е направено. Одговорноста ја префрла врз останатите надлежни во процесот.
На иста линија со министерот Шаќири е и премиерот Димитар Ковачевски. Тој пак е убеден дека годинава проблемите ќе бидат помали од претходната.
Министерот Шаќири ден пред стартот на школската година потврди и дека во шесто одделение по предметот историја и оштество ќе се изучува историја, географија и граѓанско образование, но кажа дека тоа нема да влијае негативно врз работата на наставниците.
Од утре новата учебна година стартува со низа промени, но и лански проблеми. Различно времетраење на учебната година, воведување пролетен распуст, ветување за повисоки плати за наставници, нови безбедносни мерки за училиштата, повеќе образовни асистенти и нов електронски дневник. Од годинава ќе има и пролетен распуст кој ќе трае од 29 април до 5 мај, а учебната година ќе заврши на 17 јуни.
Изминатата учебна година заврши без дел од учебниците, а министерот постојано ветуваше дека следниот месец ќе пристигнат.
Тамара Марковска