Ако Собранието беше студент, ќе паднеше на испитот по „квалитет на дебата“. Според „професорот“ Институт за демократија, за првото полугодие од оваа година, на скалата од 1 до 10, оценката е непроодна 5,5, или описно – ниско ниво на квалитет на дебата со простор за значително подобрување. Анализирани се точките на дневен ред од областите: владеење на правото, човекови права и демократија.
Речиси половина од говорниците – 49 одсто немале аргументи во своите излагања, 44 одсто имале слабо аргументирање, 7 одсто користеле само еден аргумент, 0,4 одсто или во дискусиите на осуммина пратеници се користени 2 аргументи, а само 0,1 одсто користеле повеќе од 2 аргументи. Ако се погледнат графиконите според политичката припадност, власта и опозицијата се речиси изедначени. 53 одсто дискусии и на власта и на опозицијата немаат ниту еден аргумент, а слаба аргументација изнеле 44 одсто од власта и 42 одсто од опозицијата. Пратениците се покажаа и незаинтересирани за аргументацијата на другата политичка страна: мнозинството оддало признание во 3 одсто дискусии, а опозицијата во само 2 одсто.
Според бројот на дискусии, односот е несразмерен – опозицијата учествува со 76 одсто а власта со 24. Соодветно на тоа, шампион во јавување за збор е Здравко Трајанов со дури 85 пати.
Институтот за демократија констатира мало влошување на квалитетот на дебата во однос на претходното шестмесечие и сугерира: зголемување на информираноста на пратениците и на нивното знаење за темите, минимално користење на скратената постапка и на европското знаменце, како и воведување календар на седници – за да може пратениците соодветно да се подготват за секоја точка.
Соња Николовска