Специјализантите да не бегаат на работа во странство и државата да има придобивки од нивното образование. Министерот за здравство Меџити е јасен во своите намери – лично ќе побара лекарите наместо пет, да бидат обврзани да работат една деценија во Македонија по завршувањето на специјализациите.
Законските прописи сега ги обврзуваат тазе завршените специјализанти на половина од тоа, пет години работа во земјава.
„Законските решенија се тие, таков е законот. Го разгледав ова и навистина истото ми претставува мака уште од почетокот. Мислам дека пет години е малку и лично како министер ќе побарам овој рок малку да биде подолг. Ако сега е пет години тогаш еве нека се зголеми на десет години, да не споменуваме и некои финансиски импликации. И да оставиме лекарите самите да се одлучат“ изјави денес Фатмир Меџити, министер за здравство.
Миграцијата не се спречува вака, туку со вработување на младите лекари, дефиниран кариерен пат, редовна исплата на надоместоци и дежурства.
Од тоа да се почне, а потоа да се бара лојалност од лекарите-специјализанти, порачува доктор Божидар Кочоски од Асоцијацијата на специјализанти и млади лекари.
„Миграцијата на специјализантите и начинот на кој министерот сака тоа да го спречи мислам дека е погрешно адресирано. Со овој договор нема да се натераат специјализантите да бидат обврзани и да бидат лојални кон институциите во коишто работат. Мора да се создадат други услови за тие да ја возвратат својата лојалност. Редовно да се плаќаат дежурствата, да нема притисоци од страна на раководните лица на установите врз специјализантите“ е ставот на д-р Божидар Кочоски од Асоцијацијата на специјализанти и млади лекари.
Властите веќе подолг период најавуваат и нови вработувања на лекари, но и повисоки плати.
Од друга страна, лекарите велат – периодот од шест години специјализација само им прави противуслуга на здравствените установи, особено кога имаме недостаток на одредени специјалности и миграција на персоналот.
Петар Догов