Руските сили го започнаа јуни со ново воздушно бомбардирање на Киев, при што загинаа најмалку три лица, а уште неколку беа повредени, соопштија властите.
По пријавените 17 напади врз главниот град на Украина во мај, главно со помош на беспилотни летала, руските сили го погодија Киев пред зори со проектили од земја, оштетувајќи станбени згради, една клиника, и други цивилни цели.
Градската управа на Киев соопшти дека загинале три лица, меѓу кои две деца, а 10 други лица се ранети.
Властите во Киев ги повикаа жителите да внимаваат на предупредувачките сирени и да останат во засолништа или други безбедни локации.
Првичните информации се дека киевската противвоздушна одбрана ги пресретнала сите проектили утринава, како и дека смртни случаи и повреди биле предизвикани од паѓање на остатоци.