После црниот петок, прогласен од синдикатите за во Собранието, усвоените Бехтел&Енка закони, следуваше брз понеделнички потпис на Указите за сите 5 закони.
Претседателот Стево Пендаровски објави дека ги потпишал по консултација со своите правни експерти, а особено се задржа на законот за работни односи. Тврди дека никаде ја нема озлогласената формулација за 60-часовна работна недела и поради тоа го потпишал ова законско решение.
На прашањето на Телма, претседателот Пендаровски објасни дека овие измени се однесуваат на оние сезонски работи како што е градежништво, но не појасни дали новото законско решение ќе биде искористено и во други сезонски занимања и дејности.
-Синдикатот и неколку невладини организации минатата година кога беше донесен специјалниот закон го оспори целиот. Уставниот суд рече дека целиот закон е во ред освен член 12 каде пишува 60-часовна недела. Никому не оспорувам право и сега да поднесе и да каже дека ова мое толкување не држи. Таму освен што нема експлицитно кажано 60-часовна, ќе биде работна недела по работник, има една друга одредба која ми помогна со поддршка на моите советници, тврди Пендаровски.
-На пример членот 117 во ставот 2 зборува за тоа колку може да трае прекувремената работа (најмногу 8 часа во текот на една недела, најмногу 190 часа годишно) и вели освен за работи кои имаат специфичен процес на работа. Да преведам тука, зборуваме за патишта, знаете дека сезоната трае три до шест месеци максимум – јануари-февруари никој не поставува асфалт, така што на ниво на квартал или година, мое уверување е дека нема да се пробијат законските саати, го образложи својот став за потпишување на Указите, Претседателот Стево Пендаровски.
Кој смета дека Бехтел&Енка законите не се уставни, ќе може да ги предизвика на Уставниот суд, кој е крајната инстанца за прогласување на уставност на определни законски одредби, наведе Пендаровски и ја спомна и дебатата која според него не се одвивала со аргументи на конкретната тема.
-Сакам да укажам дека дебата од мал број субјекти беше употребена или злоупотребена за зголемување на и онака високата поларизација во нашето општество, што го оттргна фокусот од вистинските прашања поврзани со овие закони. Наместо дискусијата да се насочи кон придобивките и можните ризици во однос на проектот, јавната дебата се претвори во расправа за нашите стратешки евроатлантски ориентации и аспирации, наведе Пендаровски.
5-те Бехтел&Енка закони се дел од договорот потпишан со овој конзорциум за изградба на Коридорите 8 и 10Д.
Договорот уште не е објавен затоа што потписниците сметаат дека е деловна тајна, а опозицијата повикувајќи се на свиркачи,објавува информации за пенали доколку не се обезбеди 60 часовна работна недела на изведувачите на двата патни правци.
Контроверзниот и таен договор во скратена варијанта со помалку од половина страници е испратен на разгледување во Обвинителството, Антикорупциската комисија и во Собранието.
Пендаровски се наврати и на можноста за кандидатура за нов претседателски мандат откако и негови колеги од истото политичко крило (како министерот Оливер Спасовски) се јавува во шпекулациите како можен кандидат. Тврди дека со своите постапки па и овие поврзани со Бехтел и Енка не бара поддршка туку тера сопствен пат кој според него граѓаните можеле да го увидат во последните 4 години откако е во резиденцијата на Водно.
-Не сум калкулирал со поддршка никогаш. Слушам дека некои размислуваат и во една слична, малку модификувана насока – дали бидејќи ‘Бехтел и Енка’ се во заднина, јас ако потпишам, ќе ја добијам поддршката од Америка?! Тоа се детски анализи, никогаш немале втемеленост во реалноста, ако е нешто во прилог на граѓаните, го потпишувам, сосема небитно кој го предлага до мене. Ако е нешто спротивно на нивните интереси, кој и да се јави, не може да ми влијае, оцени Пендаровски.
Миомир Серафиновиќ