Полицијата сè уште врши увид на мостот „Беласица“, што се наоѓа меѓу Железничката станица и Ист Гејт мол, кој синоќа на полноќ беше опожарен, а утрово околу 4 часот изгаснат. Во пожарот кој го зафатил долниот дел на мостот, биле опожарени електрична и топловодна инсталација, што во прв момент го отежнало гаснењето од Бригадата за противпожарна заштита, велат од Центарот за управување со кризи (ЦУК).
Од тие причини, сообраќајот на мостот „Беласица“ е во преќин и забранет, а возилата, но и пешаците се пренасочени за движење по околните улици. И така ќе биде се додека тим од Град Скопје не ги утврди штетите на мостот и додека не се добијат информации за негово повторно отворање или извршено санирање. А, забрането е и движење под мостот.
Во гаснењето на пожарот интервенирале 21 пожарникар со 8 противпожарни возила, а била зафатена површина од 2.000 м2. За настанатата состојба биле известени сите надлежни институции што посредно и непосредно имале инсталација на мостот и во близината на мостот. Биле известени МВР кои целосно го блокирале сообраќајот на мостот, бензинска пумпа „Макпетрол“, АД „Гама“ Скопје кои биле на лице место и утврдиле дека немаат гасоводена мрежа што минува на овој потег, како и Македонски железници, кои во одреден временски период на пожарот, го исклучиле напојувањето со електрична енергија, ЕВН Македонија и АД ЕСМ, поради оштетен дел од цевките за парно греење, по што тие испратиле екипа за санација на цевките“, информираат од Регионалниот ЦУК Скопје.
За причината за пожарот и материјалната штета дополнително ќе известат од МВР.
