Што ќе зборуваат членовите на Судски совет повеќе не смее да се снима со камера. Новинарите да прераскажуваат што слушнале, а снимателите да прават снимки само две-три минути на почетокот на седницата. Судскиот совет на чело со новиот претседател Сашко Горгиев им скрои нови правила на медиумите за известување од седниците. Забраната за снимање доаѓа по тензичната седница за итно разрешување на Дамева која експертите ја нарекоа скандалозна и незаконска, а јавноста ја виде преку видео снимките на медиумите.
Зошто наеднаш камерите станаа проблем за концентрацијата на членовите во Судски совет не даде никој објаснување, особено што просторните услови се исти повеќе од една деценија. Новите правила членовите на Судски совет ги договориле на колегиум, но на седницата членовите не сакаа многу да образложуваат. Горгиев инсистираше да се произнесат со тврдење дека на колегиум говорат, а на седница молчат. По ова, дел од неговите колеги дадоа некакво објаснување, но и предлози државната агенција да ги снима седниците и да ги споделува со другите медиуми.
Потоа отидоа на пауза која се претвори во колегиум од кој се вратија со истиот став.
Георгиев веднаш по изборот најавуваше отвореност и транспарентност, а првата одлука што ја соопшти на првата седница беше токму забраната за снимање.
Пред девет години, по слично сценарио, со речиси идентични причини, уставниот суд предводен од Елена Гошева забрани снимање на седниците.
Елена Ивановска Мукоска