Тензии, караници, надвикување… Вака почна првата комисиска седница за еден од најспорните закони од пакетот што треба да обезбеди привилегии за „Бехтел и Енка“, при изградба на автопатите – измените на Законот за работни односи. Претседателот на комисијата за Труд и социјална политика, не сакаше да им дозволи процедурални забелешки на пратениците од опозицијата, на што тие бурно реагираа. Бараа и Елми Азири да се повлече, од причина што со оваа комисија секогаш претседава опозицијата, а Алијанса сега се дел од власта, но тој одби.
Расправата за измените, кои треба да обезбедат 60 часовно работно време, вклучително и работа во недела, без прецизирано право на надоместок за прекувремена работа, за опозицијата е беспредметна.
Пратениците бараа и увид во договорот, ако треба и со безбедносен сертификат, за да се види дали навистина премиерот и вицепремиерот се обврзале на плаќање пенали ако законите не бидат донесени.
Тричасовните процедурални забелешки денеска завршија без епилог. Пратениците од власта дофрлаа од место, но немаа можност да дискутираат, затоа што се` уште не е утврден ни дневниот ред.
Левица најавија блокада со 1.111 амандмани, додека по три поднесоа и од ВМРО-ДПМНЕ и Љупчо Балковски од ВМРО Народна, кој иако е дел од владејачкото мнозинство, се противи на законите.
Далиборка Демјанска Цветановска