На последниот ден од Европското првенство во атлетика во сала што се одржа во Истанбул поделени се медали во 13 дисциплини.
Прва ѕвезда на шампионатот е Норвежанецот, Јакоб Ингебритсен кој по триумфот на 1500 метри освои злато и на двојно подолгата патека и го повтори успехот од пред две години во Торино. Втор низ целта мина Адел Мечал од Шпанија додека трет е Србинот, Елзан Бабиќ.
На 800 метри славеше Шпанецот, Адријан Бен, кој беше побрз од Бенжаман Робер од Франција и Белгиецот, Елиот Крестан.
Гркот, Милитијадис Тентоглу ја потврди фаворитската улога во скок во дачечина. Тој славеше со 8 метри и 30 сантиметри пред Швеѓанецот, Тобијас Монтлер и Габриел Битан од Романија.
Во отсуство на Арман Дуплантис, златото во скок со стап го освои Сондре Гутормсен од Норвешка. Сребрениот трофеј му припадна на Емануил Каралис од Грција, а трет е Полјакот, Пјотр Лисел.
На 60 метри со пречки славеше Швајцарецот, Џејсон Џозеф, а во седмобој најдобар беше Кевин Мајер од Франција.
Кај дамите најнеизвесно беше во скок во далечина каде триумфираше Британката, Јазмин Соерс со прескокнати 7 метри што е најдобро постигнување во светот за оваа година. Втора е Лариса Јапичино од Италија, а дури трета главната фаворитка за златото Ивана Вулета.
Во скок во височина прво место за Јарослава Махучик од Украина, на 800 метри златен медал за Кили Хоџинсон од Велика Британија, а на 60 метри со пречки триумф на Рете Хурске од Финска.
Во штафетата 4 пати по 400 метри очекувано победа на Холандија пред Италија и Полска.
ФОТО: Игор Паневски