И денеска како и изминатите денови Скопје е дел од најзагадените градови во светот. Според IQAir, швајцарска технолошка компанија за квалитет на воздухот, последните десет дена главниот град нa Македонија неколку пати се најде рангиран меѓу најзагадените градови во светот. Нивоата на ПМ10 и ПМ 2,5 честички во воздухот измерени во Скопје беа околу 28 пати повисоки од безбедносниот праг утврден од Светската здравствена организација.
Деновиве во скопската котлина се задржа и густа магла која дополнително ја влоши состојбата со загадувањето. Според најавите на метеоролозите за денеска попладне се очекува можно расчистување.
Според здравствените работници најпогодени од ваквото време се хронично болните и децата, барем според повиците кои ги добила итната медицинска помош.
Покрај во Скопје висока загаденост е регистрирана и во Штип, каде веќе седми ден е меѓу градовите со загаден воздух, покажуваат мерните станици на лабараторијата АМБИКОН на Универзитетот „Гоце Делчев“-Штип.
Ректорот на Универзитетот, кој воедно ја раководи и лабараторијата, Дејан Мираковски вели дека Штип вчера бил со најзагаден воздухот, мерните станици покажале трипати поголемо загадување, односно измерени се 171 микрограми ПМ честички, додека утринава изнесуваат 108 микрограми ПМ честички. Штип досега имаше најчист воздух во земјава, но веќе една недела го нема ветерот и намалена е и видливоста заради густата магла, која не е карактеристична за овој град.
Мираковски потенцира дека греењето на дрва на домаќинствата, кои поради енергетската криза во поголем број се вратија на овој начин на затоплување на своите домови, е причината за зголеменото загадување на воздухот.