Нова помош и германска донација од 360 илјади евра за полицијата, ама на церемонијата не се појави заменик министерот за внатрешни работи Назим Буши.
Тој го придружуваше министерот Спасовски на средбата со амбасадорката Анке Холштајн, ама пред новинарите и во обиколката на донираните автомобили со флешери, сирени и ротации не се спушти.
На прашањата за скандалот за синот на Буши дека возел автомобил со флешери, кои министерот ги негира како шпекулации повторно одговараше Спасовски.
Сообраќајниот инцидент беше пред 11 дена, МВР истражува од понеделникот, а стигна ново ветување дека за ден ќе има соопштение.
-Направивме малку поопсежна истрага, не само за тој момент. Има снимки каде поминал. И за се тоа во текот на денот или најдоцна утре претпладне ќе има соопштение, рече Оливер Спасовски, министер за внатрешни работи.
КОД на Телма вчера објави нови детали за скандалот, дека синот на Буши користи два автомобили со регистрација 0202, но објави и дека Аудито А6 еднаш е сликано на пајак во Дебар Маало кога и со нечија интервенција било спуштено без пишан прекршок, а вториот пат заедно со полициско возило е паркиран пред Ист гејт мол на место каде е забрането паркирање.(ФОТО долу).
Спасовски останува на ставот дека за се треба да ги известиме МВР и обвинителството иако институциите и по допрен глас може да преземат мерки и се платени за тоа од граѓаните.
Уверува нема селективност затоа што полицајците му пишале и казна за сообраќаен прекршок на опозициски пратеник викендов.
-Нема селективнос. А навистина ќе ви бидам благодарен за информациите кои ги имате и во делот на кривичниот прогон, доколку тие информации ги доставите до нас или до обвинителството, рече Спасовски.
Втората поголема работа, важната истрага за кражбата на масло од канабис од фабрика пред која често бил паркиран автомобилот со лизинг од банка но користен од синот на Буши, засега е далеку од крај.
Миомир Серафиновиќ