Сведочам на заробен град, на неефективна администрација, на неефективен Совет. Колку претседателот да кажува дека Советот е ефективен, се тоа е насила, истакна Љубица Јанчева, советничка на СДСМ во Советот на Град Скопје во вечерашното издание на „Вин-Вин“ на ТВ Телма.
„Сведочам на никаква комуникација меѓу двата органа на Град Скопје. Тоа се Совет и градоначалник кои се две страни на една паричка и ако нема минимум заедничка кохезија, просперитет за градот нема, а ние сме сведоци на сето тоа. Жалам што добивме таква градоначалничка“, рече Јанчева која беше и во претходниот состав на Советот на Град Скопје.
Таа забележа дека никогаш досега не добила одговор на советничко прашање за што беше резервирана и последната седница на Советот на Град Скопје која се претвори во театар и вербални расправии и надмудрувања меѓу градоначалничката Данела Арсовска и претседателот на Советот, Трајко Славески.
„За усно не станува збор. Не сум добила ниту написмено, а нејзина должност е да дава одговор на секое советничко прашање што е поставени и на седница и во периодот меѓу две седници“, потенцира Јанчева.
На последната седница на Советот на Град Скопје, Арсовска и Славески го спуштија нивото на комуникација, а нивните меѓусебни надмудрувања имаше можност да ги слушне и јавноста.
„Еве овој микрофон ви е на располагање. Имате и фотелја што е многу поудобна од онаа во која што седите во магарешките клупи назад“, ѝ се обрати Славески на Арсовска и веднаш даде пауза од 15 минути бидејќи, како што рече, „повторно имаме неовластено користење на опрема“.
„Господине Хитлер, не сметам дека ви доликува да го правите овој циркус во овој Совет. Навистина е недолично тоа што го правите. Прво го кршите Уставот, второ сте ситен лопов и сте човек кој што краде и не е во ред тоа што го правите“, му возврати Арсовска.