Женската ракометна репрезентација на Македонија во првиот дуел од Главната рунда на Светското првенство за младинки што се одржува во Скопје освоија бод против Шведска откако со погодокот на Теодора Дукоска во последните секунди стигнаа до 20:20.
Лошите отворања на првото и второто полувреме, но и грубата игра во одбраната на Швеѓанките се причината поради која освоивме бод во овој дуел, а на моменти имавме шанса и за поубедлива предност со која ќе бевме поблиску до победа.
Шведска во седмата минута поведе со 4:1 и предноста ја одржуваше се до 21-та минута од првиот дел кога со серија од 6:0, Македонија стигна до водство од 10:9, а на одмор заминавме со предност од 12:10.
Во второто полувреме на првиот гол на нашата репрезентација чекавме 10 минути, но и овој дел од мечот Шведска само успеа да ја надополни негативата од два гола по првите триесет минути.
Во завршните 10 минути Швеѓанките влегоа со предност од 17:15, но во завршницата успеавме да се вратиме во мечот, да стигнеме до израмнување, но и да пропуштиме низа шанси за водство.
Сепак на крајот Македонија со огромна поддршка од трибините успеа да стигне до бод, а за влез во четвртфиналето се уште ни е потребна победа над Исланд в петок или да се избориме за уште еден нерешен резултат.
Најефикасна во македонската репрезентација со пет гола беше Ива Младеновска, а по три пати прецизни беа Емилијана Ризоска, Дукоска и Ива Велкова додека Марија Јовановска имаше 11 интервенции.
Следниот натпревар против Исланд го играме в петок во арената Борис Трајковски, а почетокот е закажан за 20 часот и 30 минути.
ФОТО: Игор Паневски